იპოვე მეგობარი?

თავიდან მეგონა ეს ორი წიგნი მხოლოდ მოზარდი გოგონებისთვის წასაკითხად იყო განკუთვნილი, თუმცა, შევცდი! მეც, როგორც დედამ, ბევრი საინტერესო აღმოჩენა გავაკეთე.

24 საათი 19.06.11

თავიდან მეგონა ეს ორი წიგნი მხოლოდ მოზარდი გოგონებისთვის წასაკითხად იყო განკუთვნილი, თუმცა, შევცდი! მეც, როგორც დედამ, ბევრი საინტერესო აღმოჩენა გავაკეთე.

ასე რომ, ქალიშვილი თუ გყავთ, გირჩევთ არ დააყოვნოთ და კითხვას შეუდგეთ. რაც შეეხება ბიჭებს, მათთვის ვინც უიმედოდაა შეყვარებული, ვისაც სურს სატრფოს გულს გასაღები მოარგოს, თინეიჯერი გოგონების არაადეკვატური ქცევისა და ალოგიკური პასუხების ამოხსნას მიაგნოს - რეცეპტების ნამდვილი კრებულია!

მოკლედ, იმის თქმა მინდა, რომ ზაფხული ახლოვდება და არდადეგებზე წასაკითხი წიგნების ყიდვას უნდა შეუდგეთ - ანუ დროა ლუის რენისონი და ენ ბრაშერესი გაიცნოთ, ვინაიდან, თუ მათ შესახებ არაფერი გსმენიათ, თინეიჯერიც არ ყოფილხართ - ასე "ხუმრობენ" ევროპასა და ამერიკაში!

ლუის რენისონის "ჯორჯია ნიკოლსონის აღსარება" და ენ ბრაშერესის "ოთხი გოგო და ერთი ჯინსი" წიგნის ფსტივალზე აღმოვაჩინე, უფრო სწორად ჩემს თორმეტი წლის გოგონას გაექცა თვალი - ყდებმაც მოხიბლა და სათაურებმაც. ქართველი მოზარდები ნამდვილად არ არიან გათამამებული მათთვის შესაფერისი, საინტერესო თანამედროვე ლიტერატურით, თინეიჯერების ნამდვილ ცხოვრებას რომ ასახავს. ასე რომ, ამ ორი წიგნის თარგმნისა და გამოცემის ინიციატორების სასახელოდ უნდა ითქვას, რომ მათ საჭირო ნიშა დროულად დაიკავეს. მშვენიერი დასაწყისია - დიახ დასაწყისი, ვინაიდან საგამომცემლო სახლი MEREBASHVILITYKESSON PUBLISHING სწორედ ამ წიგნებთან ერთად გამოჩნდა და მოკლე დროში ერთგული მკითხველის შემოკრებაც მოასწრო.

ყველაფერი შარშან, ლიტერატურულ კონკურს "საბას" დაჯილდოვების ცერემონიაზე, ერთი სასიყვარულო ამბით დაწყებულა: შვედეთიდან ჩამოსული მიქაელ ტიკისონი საქართველოზე წიგნის გამოშვებას გეგმავდა, საბოლოოდ კი ნათია მერებაშვილზე დაქორწინდა, ცოტა ხანში კი საგამომცემლო საქმე წამოიწყეს. იმთავითვე საყმაწვილო ლიტერატურაზე აიღეს ორიენტაცია და არჩევანი პოპულარული ავტორების ბესტსელერებზე შეაჩერეს. რაც შეეხება "იმ წიგნს" - საქართველოზე... ჯერაც გამოუცემელია!

მაშ ასე:

ავტორი ლუის რენისონი.

მთარგმნელი ნათია ვარდიაშვილი

ორიგინალური ინგლისური

სათაური: ANGUS, THONGS AND FULL-FRONTAL SNOGGING

ქართულად: "ჯორჯია

ნიკოლსონის აღსარება"

სახალისოდ: ჩემი შოტლანდიური კატა, "ნიფხავი-მატყუარა" და კოცნა

ჩახვეულ-ჩახუჭუჭებულად

დღიურებს თუ წერდით ბავშვობაში? მე ვწერდი და საგულდაგულოდ ვმალავდი, თუმცა, დედა მაინც პოულობდა და სამწუხაროდ კითხულობდა კიდეც. როცა უხასიათოდ ვიყავი და ჯორჯია ნიკოლსონის მსგავსად ჩემოვწერდი დღიურში "საკუთარ ცხოვრებაში აღმოჩენილ შეცდომებს," ან მეგონა, რომ მეგობარი აღარ მყავს, "ქალბატონი უშნო" გახლავართ ან სულაც "მკვდარი ვარ!" დედა უსათუოდ ჩამიტარებდა გამამხნევებელ ლექციას. ვუსმენდი და გულში ვამბობდი: "ისევ წაიკითხა!" დღიურებს ჩემი ქალიშვილიც წერს და ვამაყობ, რომ ჯერაც არ გადამიშლია. არა მგონია, ჩემი საქციელი მხოლოდ ბოქლომიანი დღიურის დამსახურება იყოს (თუ ძალიან მოვინდომე, გასაღებსაც მივაგნებ), ჯორჯია ნიკოლსონის გულწრფელი ჩანაწერები კი დიდი ინტერესით წავიკითხე - ვაღიარებ, ცნობისმოყვარეობა არ მაკლია!

როგორები არიან თინეიჯერი გოგონები? დიდები! დიახ დიდები და მათი მოწიფულობა გვინდა თუ არა, უნდა ვაღიაროთ. თურმე, ოცნებობენ ჩვენს ყურთასმენას მოაწვდინონ შინაგანი ხმა: "ვეღარ ხვდებით ბავშვი რომ აღარ ვარ!.. თოთხმეტი წლის ვარ, დავქალიშვილდი!" ჩვენ გვსურს "სულ ის სასაცილო იხვებიანი ქუდი ეხუროთ თავზე," ისინი კი უფლებებზე გვედავებიან, საკუთარი ოთახის კარის ჩაკეტვა და "კოცნის ტექნიკის დაუფლება" სურთ!

აბა, რა აზრის ხართ? კამათი უნდა განაგრძოთ? "უფროსები ყველაფერზე ქოთქოთებენ," - პასუხი მზად არის, უფრო მეტიც, "ქვის ხანის ცოცხალ მემატიანედ" ჩაგთვლიან და რიგში ჩასადგომად გაგამწესებენ - ჯორჯია ნიკოლსონს ვერც დათვლით იმდენი საყვედური მიუღია და "საყვედურების მაღაზიის" გახსნას გეგმავს.

ყურებს ნუ ჩამოყრით, მშობლბო, არც ისე ცუდადაა საქმე. ჯორჯიას დღიურში არის დღეები, როდესაც ის გამოსწორებას ცდილობს, სერიოზულ გადაწყვეტილებებს იღებს, ცდილობს "ნაკლებად ზედაპირული და ფუქსავატი იყოს, მეტი თანაგრძნობა გამოიჩინოს სხვების მიმართ." ხოლო თუ დედიკოს ჰგონია, რომ "განზრახ არ აქცევს ყურადღებას სად რა დგას," აი, მისი გულახდილი პასუხიც: "ვერ ვარჩევ განსხვავებას დალაგებულს და დაულაგებელს შორის!" სიმართლე გითხრათ, ამ პასუხმა მეც ამიხილა თვალი და ... დავმშვიდდი.

ახლა კი დროა, გავჩუმდე, თორემ მთელ წიგნს ჩამოგირაკრაკებთ. ჯობია, თავად გაეცნოთ ჯორჯიას მახვილგონივრულ ჩანაწერებს, მის სიხარულებს, გაუფასურებებს, ემოციებს და კურიოზული სიტუაციებს. წინ ანგუსთან, ჯორჯიას დასთან, დაქალებთან, კოცნის "მასწავლებელთან" და რაც მთავარია SG-სთან შეხვედრა გელით. მხოლოდ იმას მოგახსენებთ, რომ წიგნში აღწერილი ამბების ნახევარზე მეტი ლუის რენისონის ცხოვრებიდანაა. წიგნმა უამრავი ჯილდო აიღო, ხოლო 2008 წელს მის მიხედვით ფილმი Angus, Thongs and Perfect Snogging გადაიღეს და ჯორჯიას როლის შემსრულებელი ჯორჯია გრუმი საკმაოდ პოპიულარული გახდა.

ახლა კი ნომერი პირველი ბესტსელერი "ნიუ-იორკ ტაიმსის" რეოტინგით:

ავტორი ენ ბრაშერესი

მთარგმნელი თამარ კლიმიაშვილი

ორიგინალური ინგლისური

სათაური: THE SISTERHOOD OF THE TRAVELING PANTS

ქართულად

"ოთხი გოგო და ერთი ჯინსი"

მერა რა რომ თექვსმეტი წლის არიან? მაინც ოცნებობენ სასწაულზე ამ სიტყვის პირდაპირი თუ გადატანითი მნიშვნელობით და ეს საწაულიც ხდება: ჯორჯტაუნის გარეუბანში, მეორადი ტანსაცმლის მაღაზიაში 3 დოლარად და 49 ცენტად შეძენილი ერთი უბრალო ჯინსი მათი ჯადოსნური თავგადასავლების მიზეზი ხდება. მათი, ანუ კარმენის, ლენასი, ტიბისა და ბრიჯიტის.

"ჩვენ ყველა დაბადებამდე გავხდით "ჩვენ!" - ასე თვლის ოთხი გოგო. დედებმა ფეხმძიმობის დროს გაიცნეს ერთმანეთი და დაახლოვდნენ, თუმცა ამჟამად სანიმუშო მეგობრობით ვერ დაიტრაბახებენ, მათი ქალიშვილები კი მართლაც შეუდარებლები არიან ამ საქმეში. ყველა ზაფხული ოთხი გოგოს ცხოვრებაზე განსაკუთრებულ კვალს ტოვებდა. ზაფხული იყო დრო, როდესაც ყველა მათგანის ცხოვრება ერთიანდებოდა. დაბადების დღღებიც ზაფხულში ჰქონდათ და ყველაზე მნიშვნელოვანი მოვლენების მომსწრეებიც ზაფხულში ხდებოდნენ. მაგრამ ახლა,

ოთხივე სხვადასხვა მიმართულებით მიემგზავრება და ამბავიც იმ ზაფხულიდან იწყება, რომელიც ყველამ ცალ-ცალკე გაატარა. წიგნი თითქოს კითხვის პროცესში იწერება - დიახ, ეს მართლაც ასეა. "მოგზაური შარვალი" მხოლოდ ტანსაცმელი როდია, მისი ტოტები ერთგვარი მოგონებების ფურცლებია: "მარცხენა ტოტზე უნდა დაიწეროს ყველაზე შთამბეჭდავი ადგილის სახელი, სადაც ყოფილხარ და შარვალი გეცვა, მარჯვენაზე ყველაზე მნიშვნელოვანი რამ რაც შეგემთხვა, როდესაც შარვალი გეცვა," - ასეთია პირობა და ვინც პირობას არღვევს სასტიკად ისჯება (ჯობია დასჯის პირობებს თავად გაეცნოთ;-) "შარვლის დობილებისთვის" სხვა წესებიც არსებობს. როგორ ჩაიცვან შარვალი, ვის როდის უწევს ჩაცმა და როგორ იქცევა როცა ჩაიცვამს - მთელი ფილოსოფიაა! საიდუმლოდ უნდა გითხრათ კიდევ ერთი უცნაურობა: გარეგნობით, აღნაგობით და სიმაღლით ერთმანეთისგამნ აბსოლუტურად გაანსხვავებულ ოთხ გოგოს შარვალი საუცხოოდ ადგას ტანზე.

აქ ვჩერდები და იმედს ვიტოვებ, უჩემოდაც მშვენივრად მოირგებთ შარვალს თუ წიგნს, თქვენს თანატოლ გოგონებთან ბევრ მსგავსებას და განსხვავებას აღმოაჩენთ და უსათუოდ დადგებით ფანტაზიის ხასიათზე. ვინ იცის, ეგებ ერთ უბრალო, შეუმჩნეველ და ყოველდღიურ ნივთს თქვენც შესძინოთ ჯადოსნური თვისებები, ცხოვრება გაილამაზოთ და მეგობრობა გაამყაროთ.

P.S წინასწარ წარმოვიდგენ, როგორ მოგეწონებათ ლუის რენისონის "ჯორჯია ნიკოლსონის აღსარება" და ენ ბრაშერესის "ოთხი გოგო და ერთი ჯინსი," ამიტომ MEREBASHVILITYKESSON PUBLISHING-ის სახელით გაფრთხილებთ რომ ორივე წიგნის გაგრძელება მალე ითარგმნება და გამოიცემა!

მაკა ლდოკონენი